مشينا الشقلة ودخلنا بيوتا شفنا شبابا غلبنا نفوتا
منتديات الشقلة عوج الدرب ترحب بك
نسعد بزيارتك لنا
وتعمنا الفرحة بتسجيلك وانضمامك الى اسرة الشقلة عوج الدرب

قصة.........عيشة ..........رغيفة

اذهب الى الأسفل

قصة.........عيشة ..........رغيفة

مُساهمة من طرف ???? في الثلاثاء نوفمبر 24, 2009 4:43 pm

أول حاجة انا ما اسمي عيشة.. اسمي الاساسي الاساسي رغيفة مرات بدلعوني بقولوا لي خبز.. اسم عيشة جيت لقيتو لمن اشتراني الراجل الفقران دا. اول ما جا دخل لبيتو عيالو الكتار جو هجموا علي واي واحد كان ينادي: اديني عيشة.. اديني عيشة.. وهاك يا قروض.. ومن ديك وعيييك.. اسم عيشة لصق فيني.. ومليشات الراجل ما اقول ليك كان عشرة ولا عشرين نزلوا فيني قرض.. قرض شديد لمن كملت من دقيق الدنيا.. أنا هسي بعاني.. بعاني معاناة شديدة وعايشة مأساة حقيقية (لأنو اول مرة في حياتي اتعرض للقريض.. أنا اصلي مسقط رأسي المخابز التركية وكدا..
ويصنعوني من الدقيق الابياآآآآآض الناعم حتى عجني يتم بالآلات الكهربائية الحديثة.. بعدين لما انجض بشيلوني اولاد الراحات.. الناس الرايقين المنعمين.. بياكلوني باللحوم البيضاء والحمراء والسلطات الما خمج والاجبان البقاطعوها مرة وبياكلوها مرة ديك.. يعني انا طوالي في حالة الق والناس مشتهني ولمن خلاص اكبر وعمري الافتراضي يقرب ينتهي بنشفوني.. في الضل ما في الشمس وفي حتة نضيفة لا غبار ولا ضبان عشان يجو يعيدوا استعمالي تاني.. في الكفتة او السلطة البيضا.. او يلخبتوني مع الكبكبي ويسوني طعمية.. المهم في النهاية مصيري ما بطال ونهايتي سعيدة.. رغيفة.. بت رغيفة.. أباً عن جد، ما حصل في حياة اسرتنا العريقة حصل لرغيفة واحدة الحاصل لي دا اصلو قالوا حبوبتي رغيفة الكبيرة وهي ست الخير النحن فيهو دا اترتبت في بيت من بيوت الانجليز اصلو ما كان برتضى انو يصنعونا من دقيق غير الدقيق الابيض وأهم حاجة انو يعملوا مننا اشكال كثيرة مدور ومفلفل وممشط ويزينونا بالسمسم والكمون الاسود البشوفنا جوا الكيس طوالي بيعرف اننا رغيفات لونا بياض على دهبي وريحتنا حلوة.. اما حبوبتي قالوا عندها مثل كانت بتقولوا بتقول: قرقوش في بيت العز ولا قروض في بيوت الفقراء.. يا دابي استوعبت المثل لأنو حياة الفقراء دي بالنسبة لينا اسطورة اصل ما قايلة انو في ناس في الاساس فقراء يمكن زمن حبوبتي لكن هسي (ان باسبول). أها نرجع للراجل والمليشا بتاعتوا بعد ان سقطت في ايديهم اسيرة مسكوني الشفع قرضك... قرضك.. بعد داك امهم جابت على ما اظن موية فول حسب الوصف البعرفو اللون والقوام وشالت بواقيني المقطوع نص والمقروم من هنا ومن هنا وقطعتني حته حته.. بيدين خشنات بالله التقول شغالة طلبة وكبتني في صحن اعوذ بالله قديم ومصدي ومكسر من هنا وهنا وحياة المخبز التركي لو ختوني فيهو وقدموني لي (لولو) كلب ناس (رزة) كان ما بتاكلني ولو شنو وشنو داك؟.. وكان طــــوالي دخلت اصــبعها في حلقها وعوووووع ومرقت كل (for dogs) الشربتو كلوا بعد داك كبت فيني مويه الفول عجنتني.. اتخيلوا عجنتني كدا بيدها طبج طبج.. وطمبجتني بموية الفول ولخبتتنا زيين حتى اصبحنا روح واحدة في جسدين.. بعد داك ختتني لاولادها الجعانين وداك يا لهط.. الهطك.. الهطك.. في كسر من الثانية قضو علي.. اها باقيي داك قالت يشربوا بي الشاي شالتني جدعتني في جردل كدا اظنها وارثاهو من حبوبة حبوبتها.. الغطاية شكل، الجردل شكل اتخيلوا لقيت منو جوا الجردل!؟ العيش البلدي بسمع بيها سمعان.. ما حصل طول حياتي الخبزية لاقيت لي عيش بلدي بالجد.. ياها العيشة ست الاسم.. هسي انا عيشة ودي.. دي عيشة اول حاجة.. قالت مدورة.. قال غايتو شكل دائري لكن جعانة مطفوجة من هنا ومحرقة من هناك ووشها مليان حبوب وجسمها مقشر ووجدانا خاوي من اللب وريحتا.. عفن خبز.. عفن خبز.. انا والله قايلاها نشفت وشبعت نشاف لكن فجأة قالت بلغة الافران البلدية ديك: (وين يا فردة.. بيضة وملظلطة كدا جابوك من وين؟ اكيد كنت عايشة بره في الافران التركية؟ واللماك فينا شنو ياختي؟ انقطع نصين انت يمين يا رخصتي يا مسروقة! اتفصلي يا اختي ارقدي الحته هنا امان.. غايتو بليل بيجي فار بكركب لكن ما بقدر يخش؟ اترعبت وصرخت: فار!!؟ وبديت ارجف قامت العيشة الناشفة ضحكت وقالت: حيلك حيلك مالك يا ختي رجفتي ذي الكستر.. مالك ما شفتي فار قبل كدا.. الفيران ديل بيقرضونا عادي مع الجماعة.. لكن ما تخافي لو دخل انا بقيف في وشو وبفديك بليني وبنقرض بدلك.. طبعا انا اتكيفت منها وشكرتها قامت قالت: افو.. افو انا عيشة بتك يا قرشوش!! الليلة الفار دا كان داير الامساك المزمن الليجي داخل.. اخدي راحتك مدي كرعيك وريحي قعرك من الوقوف، أتكي.. ارتحت من كلامها وشفبتنتها طمنتني.. كنت قايلاها من العيشات الفقريات البحقدوا علينا ونفسهم ننسخط ونبقى زيهم بلديين يعني، لكن طلعت طيبة ولبتها بيضة ذي لبتي سبحان الله، من طيبتها قمت اتشجعت سألتها: ومالك براك هنا وين اخواتك؟ والله دي قصة طويلة احكيها ليك: كنت انا واخواتي معلقين في الكيس البره داك شايفاهو... لكن الجماعة نزلوا فينا كجمي من الصباح شي قريض وشي بالسكر وشي بالمويه والملح والزيت وشي بالعريدب اتخيلي مدى الحموضة والمرارة العايشين فيها طوالي جاتني ليك صحوة نووية كدا قمت اتمردت ودخلت الجردل وقبال ما تجي بشويه كنت مقررة الليلة انتحر اكلا بالفار حتى الرمق الاخير لكن انت جيتي واتكتبت لي ساعات زيادة.. والله اول ماجيتي قلت ديل شنو المتمردين البيوض الجو انضموا ديل؟ انتو يا هنايه صحي ليه ما تمردوا؟ يعني خلاص اموركم مظبطة؟ انسى.. المشكلة انا ما قايله انو ست البيت عملت مخبئي دا ماعون عيش.. ايه الكربه الانا فيها دي؟ دا مصيري عشان بحلم بس اكون حلم جعان واحد اقوم اقع لي في زريبة جعانين يبهدلوني وملطشوني معليش نكدت عليك لكن الرحمة جايه كلها ساعات ونموت قروض.. وقلت ليها معليش لكن عندي تاني سؤال لو سمحتي بس محرج شويه.. قالت: اسألي لا احراج في القمح.. قلت: معليش يعني ما تفهميني غلط.. لكن صحيح بتسفي.. قالوا مرة لقو جوال سفه.. دي حقيقة ولا اشاعة؟.. قالت: اشاعة طبعاً فاكنها عشان انتو طوالي تكونوا راقين ونحن منحطين.. (اجي.. يالسفة في العيش والله دي خرمة دي).. هسي نحنا ما عارفين انو سماحتكم دي ماساي بتستعملوا برميد البوتاسيوم وبتبلعوا حبوب الخميرة.. مرضتو الناس بلاينحمكم بس خليها مستورة.. ما في داعي ندق الصفايح ونطلع الفضايح في النهاية كلنا بنات فرن..
avatar
????
زائر


الرجوع الى أعلى الصفحة اذهب الى الأسفل

رد: قصة.........عيشة ..........رغيفة

مُساهمة من طرف اشرف سعيد في الأربعاء نوفمبر 25, 2009 1:41 pm

تتعدد الاشكال والقمح واحد
avatar
اشرف سعيد
شقلاوى فعال
شقلاوى  فعال

المشاركات : 140
العمر : 24
تاريخ التسجيل : 05/09/2009

الرجوع الى أعلى الصفحة اذهب الى الأسفل

رد: قصة.........عيشة ..........رغيفة

مُساهمة من طرف همس القلوب في الخميس يونيو 30, 2011 3:54 pm

يسلموووو
avatar
همس القلوب
مشرف قسم كلمات الاغاني
مشرف قسم كلمات الاغاني

المشاركات : 992
العمر : 22
الموقع : الشقلة
العمل/الترفيه : النت
المزاج : 100%
تاريخ التسجيل : 25/03/2011

الرجوع الى أعلى الصفحة اذهب الى الأسفل

الرجوع الى أعلى الصفحة


 
صلاحيات هذا المنتدى:
لاتستطيع الرد على المواضيع في هذا المنتدى