جــامـعـة الـشـقـلـه الـمـفـتـوحـة

من طرف ronny_only الثلاثاء مايو 24, 2011 1:06 pm

السلام عليكم و رحمه الله تعالى و بركاته

صبح تاتا اتين في تلاته
هلا هلا على الجد و الجد هلا هلا عليهو
الناس اترمتلت بما فيهو الكفايه و فرقت و قضت زمن صاااح
جا وقت العلم بعد دا ...
غيااظ مش ههه
جــامـعـة الشـقـلـه الـمـفـتـوحـة
طبعا الاسم واضح
الجامعه دي جديده و لسه ما خرجت اي دفعه يعني دي اول سنه ليها عشان لا تقول لي برلوم و لا سنير ...
الكلام دا لي ناس كده .!
و قلنا نفتح باب التسجيل للعندهم رغبه في الدخول لهذا الصرح العلمي الكبير .
طبعا الكليه مجهزه بأساتذه ما شاء الله ذو علم و معرفه
مجهولي الهويه .. بدون اسماء .! !!
الهيكل الاداري كامل ما محتاجين الا لي الطلبه الغلبه ... ههههههههه

تعالوا نشوف الكليات,طبعآ السنه الاولى عامه (جنرال)

الكليات :

1. كليه .(الونسه الحلوه)
2. كليه .( الكلام الناعم )
3. كليه .( الجو السابع )
4. كليه .( الونسه الدقاقه)
ديل حيقطعو نجيلة الجامعه كلها
5. كليه .( التدوير و الرمتله )
6. كليه .( الدخاخين و الخيال الجامد )
7. كليه .( الشمارت و القوالات )
و في كليات لسه تحت التنفيذ و الانشاء ..
دي الكليات و النسب ما مهمه ذي اب صلعه قصدي الدولار
...
الامكانيات ::
الجامعه دي فيها كافتريا ( هاف مون ) لي ناس البيرقر و الشاورمه و الهوت دوغ و البيتزا و الفطائر الشاميه و البارد و مقهى للنسكافيه و الكابتشينو و شاي ليبتون و كل ذلك داخل صاله مكيفه و ذات مقاعد عصريه و مريحه (يعني ما محتاجين تاكلو من بره).

الناحيه الغربيه من الجامعه تحتوي على مطعم الريان الشعبي يوجد لديهم . قراصه بـ الرايب او بالتقليه او بالملاح الاخضر (خدره) و كسره بالنعيميه او الويكه ..
بالقرب منه دكان ابكر الفوراوي عندو فول و جميع ملحقات الفول او الفته و صناديق فاضيه و اربعه ازيار كبيره و باااارده

و كمان عندنا شجرة بان كبيره فيها خالتو حواء ست الشاي و عندها جبنه مبالغه(لناس المزاج).. جنزبيل تقول داقاهو بـ....... حقها .
و ما ننسى خميس بتاع الطبليه سجاير بكل انواعو برنجي قول و قولدسيل و طبعا بينسون و مارلي بور و تراديشنال بالنعناع و الكاكاو ..

المناشط :
طرابيظ بلياردو ( بلي ) موزعه على جميع اتجاهات الجامعه و اماكن اشجار النيم و اللبخ

و ايضا مقهى إنترنت (الجنرال نت كافيه)
لي ناس الماسنجرات و المنتديات و الحنك ده

غرب الميدان الشرقي في مصطبه تحت شجره نيم كبيييره لناس الخيال الواسع ( السيجارات) و الكبابي و الكاسات .!
( في جامعه بي الحلاوه دي )

دا طبعا غير الرحلات الترفيهيه الداخليه و الخارجيه و المخيامات الطويله في غابات السودان الوريفه

تحذير !
و ما عندنا اركان سياسيه يعني ناس احزاب ما يجو
و اي مظاهرات او تجمعات ما معانا .! رفد طوالي !!!
دي الجامعه باختصار شديد

للإستفسار او طلب اي معلومه
تلفونات : 090000000 او 090000000
فاكس : 8383838383
بريد الكتروني :shigla.net@hotmail.com

يبدأ التسجيل من 11/4/2011م و يستمر حتى اكتمال العدد

الاداره ترحب بكل طالب و طالبه

و بي كده يا حلوين ما عندكم اي عزر .....!!!!

و لكم كل الود و التقدير

رونـــــــــــي ...
رئيس مجلس ادارة الجامعه