نهضة شقلتي الجميلة

بسم الله الرحمن الرحيم

السلام عليكم ورحمة الله وبركاته
والصلاة والسلام علي رسول الله

عندي اقتراح لاخواتي وامهاتي بالشقلة وعاوزة الاخوان يشجعوهم ويساعدوهم في تنفيذ الاقتراح دة ونحن كمان بنساعد بالبنقدر عليه باذن الله

بشوف في قناة السودان في برنامج بيتنا في فقرة منه بيجيبو جمعيات نسائية بتقوم باعمال جميلة لتنمية المراءة وعندهم برامج تثقيفية وافكار كثيرة؛ انا بقول ياريت لو نساء القرية والفتيات لو يعملو ليهم جمعية مثل الجمعيات دي تساعد نساء القرية في اكتساب مهارات جديدة للمنزل ويكون فيها مناشط اخري مثلا يعملو ندوات دينية واشغال يدوية وممكن يضموها لجمعية حفظ القرآن الكريم" الخلوة" وتكون جمعية تكافلية تساعد المحتاجين ومن عائد اشغالهم اليدوية والخبائز والاشياء البيعملوها يكون مصدر دخل لنساء الجمعية وبكدة بنكون ساعدنا الارامل والمحتاجين بالقرية ياريت لو تطرحو الفكرة علي نساء الخلوة والمعلمات وتنطلق منهم لباقي الحلة , وعندنا الاخ منتصر البدوي اخصائي اغذية ممكن يساعد كمان ويعطيهم محاضرات عن الاغذية الصحية والسليمة واشياء كثيرة في مجاله , بناشد اخواني واخواتي في المنتدي ان يقومو بتوصيل وتنفيذ هذه الفكرة وربنا يساعد الجميع لعمل مافيه الخير للبلد واهلها