يلا نبدأ النسب

من طرف **أحمد حمد** السبت أغسطس 08, 2009 4:19 pm

عشان نعرف النسب لازم نقعد مع زووول كبييير ويحسب لينا منو الاسس الشقلة وجاب منو وممكن كمان نعمل شجرة نسب الشقلة عشان نعرف العلاقات بين سكان الحلة

وللا رايكم شنو؟

لو في زوول عارف شوية عن نسب وتاريخ الحلة حقو مايبخل بالمعلومات

سلام

موضوعك جميل ياحمد

موضوعك جميل يا احمد
لكن امشي الي عمو عباس مصطفي
عارف المعلومات دي

من طرف sara ibrahim الأحد أغسطس 09, 2009 5:37 pm

دايرنها من بسم الله قبل مايبدا اي خلط يعني من عوج الدرب اوقبله اذا امكن عليكم الله عشان نفسي اعرف حقيقه الانساب .
واختي [بت سيد البلد ] لوانتي بت عوج الدرب بعتقد انو في الحاله دي ممكن تفيدينا

من طرف samahaa الجمعة أغسطس 14, 2009 11:29 pm

هههههههههههه
بت سيد البلد
بت عوج الدرب
دخلونا معاكم في الحجا دا

وين يا شباب
مافي زول عارف نسب الشقله
حرم عليكم

من طرف sara ibrahim الأحد أغسطس 16, 2009 9:46 pm

samahaaفعلا يشبه الحجا
استعدي عشان تدخلي الحجيه
الحله اسمها الشقله عوج الدرب
يعني سيدا عوج الدرب
اها
بت سيد البلد دي المفروض تكون من احفادو
وكده يعني حتكون عارفه النسب والاشنو
واذيك يابت سيد البلد والله شوق شديد ليكي

حرم عليكم
ابد ليكم

من طرف بت سيد البلد السبت أغسطس 22, 2009 11:26 pm

سرووووووووووووووووووور اخبارك يا حبوبه والله شوق بحر وسيد البلد انا قاصده السودان كلو م الشقله بس ولو فاكره قبل ده قلت ليك في السفاره الامريكيه كل الداخلين فتشوهم الا انا وسماح وماما مررنا مرور االكرام عبر الباب الالكتروني وده لاننا اولاد سيد البلد

من طرف sara ibrahim الأحد أغسطس 23, 2009 2:21 am

كده اكيد اولاد سيد البلد مامنسي اني قريبتكم يعني قريبه اولاد سيد البلد وكده مادام قصدك سيد السودان
والله انا كمان شوق شديد
بس انسي حرقني الشمار في الاول شديد

انتي اوباما ده عمك مش با بنت سيد البلد

من طرف sara ibrahim الأحد أغسطس 23, 2009 4:58 pm

يااهلنا شكلكم نسيتو الموضوع الاساسي
ويييييييييين نسب حلتكم

من طرف معاذ الصديق الأحد أغسطس 23, 2009 7:03 pm

الواحد الا يشوف ليه زول كبير غير مافي اي حل لي موضوع نسب الحله

من طرف أم أيمن الأحد أغسطس 23, 2009 8:45 pm

اول من سكن الشقلة هم القواسمة وهم الان في العزازى والمناقل وتفرقو في الجزيرة وسكن بعدهم الشيخ العوج الدرب وسكن معاة الحبيب وسكن بجوارهم ابناء المحسى وابناء اعمامهم وسكن معهم ابناء عمومتهم االذين يلتقون معهم في جدهم السابع النور وهم اولاد كوكو اولاد بقاري واولاد الجزولي واولاد ادريس كلهم سكنو في المحسية وكانت هناك خلوة الفكى الامام التي كان يدرس فيه الانس والجن وكان بجانب الشقلة حلة حامد بجانبها حلة الحاج احمد وكانت مرابيع الحاج مساعد قرب المسعوديةوبعد ان توفى الشيخ العوج الدرب جاء اولاد العوج الدرب الى اولاد المحسي وطلبو منهم ان يسكنو معهم في الشقلة لان الشقلة قد كثر فيها العبيد وابناء المحسي هم ابناءعمومة العوج الدرب يلتقون معهم في جدهم فلاح وفلاح هو اخو ارباب وارباب هو جد الشيخ ادريس وفلاح هو جد المحسي والشيخ الياقوت وقد اشترط ابناء المحسي على ابناء العوج الدرب ان تكون لهم الشياخة وذلك بحكم ان اراضيهم اكثر من اراضي العوج الدرب وقد اتفق الطرفان على ان يكون الشيخ علي احمد المحسي وهو اخ للفكي الامام والبشير ومحمد وابراهيم وبذلك اصبحت للشقلة شياخة بعد ان كانت تابعة للجديد ثم تتابعت الشياخة لابناء المحسي الى ان وصلت الى الشيخ الامين عبد الرحمن وللحديث بقية

من طرف أم أيمن الأحد أغسطس 23, 2009 10:22 pm

يلا يا سارة وناهد انا وصلتكم لحدي جدكم كملو الباقي

من طرف بت سيد البلد الأحد أغسطس 23, 2009 10:34 pm

اوباما طبعا لا مايشرفنيش

من طرف samahaa الإثنين أغسطس 24, 2009 11:09 am

صدقي ياحبيبه
ديل طلعو اوباما سوداني
Laughing

من طرف أم أيمن الإثنين أغسطس 24, 2009 8:41 pm

تابع
وعندما ظهر تقسيم الحواشات بالشقلة الجديدة تحول الشيخ الامين من عوج الدرب الي الشقلة الجديدة وهنا ظهرت مشكلة الشياخة لان الشيخ الامين بقى في الحلة الجديدة وبعد مناقشات استقر الامر ان يكون ودمصباح وكيل للامين في عوج الدرب الى ان تولى الشياخة بعدة الحبر ود مصباح وبعد ان توفي الامين تولى الشياخة ابنة ابراهيم وتوفي ابراهيم وتوفي الحبر وانتهت الشياخة ولا توجد شياخة في الشقلة عوج الدرب ولا الشقلة الفوق

من طرف sara ibrahim الإثنين أغسطس 24, 2009 10:36 pm

شكرا ليك كتير علي التفاصيل الجميله دي اختي عروبه

جزك الله خيرا
منتظرين الباقي

من طرف samahaa الإثنين أغسطس 24, 2009 11:34 pm

شكرا اخت عروبه علي المعلومات الهامه ونحن في انتظار المزيد

من طرف محسيه وافتخر الإثنين أغسطس 24, 2009 11:50 pm

ما اي زول يشكر في نسبو يقول شي هو ماعارفوا .......................لان الاشياء دي تاريخ ليو اسيادو

من طرف sara ibrahim الثلاثاء أغسطس 25, 2009 12:22 am

,والله يامحسيه حيرتيني مابفهم كلامك والاكلامك مابكون واضح

من طرف **أحمد حمد** الثلاثاء أغسطس 25, 2009 1:32 am

اولاد كوكو =ناس علي عبدالله وادريس عبدالله وآمنة بت عبدالله وللا انا غلطان
اولاد بقاري = ناس مصطفى ودعباس ؟
واولاد الجزولي = ناس حمد الجزولي وعثمان ومحمود
واولاد ادريس =؟

من طرف samahaa الثلاثاء أغسطس 25, 2009 2:21 am

السيد المدير
وين اولاد حاج احمد
اهم ضلع

من طرف أم أيمن الثلاثاء أغسطس 25, 2009 3:14 am

ياحمد اولاد ادريس هم الحسن وبخيتة وامنة وستنا ورقية ويا سماح اولاد حاج احمد هم اولاد المحسي

من طرف أم أيمن الثلاثاء أغسطس 25, 2009 3:22 am

وبقول لي الاخت محسية اذا كنتي عارفة تاريخ غير اتفضلي واكتبي

من طرف sara ibrahim الثلاثاء أغسطس 25, 2009 5:28 am

شكرا ليك علي المعلومات دي اختي عروبه وشكرا يااحمد

يااخت عروبه انا ماعشت في عصر الاجداد study

ومابعرف شي وشي مابعرفو مابتكلم فيه واتخيل ان معظم الناس الفي المنتدي مابعرفو شي لانها دي حجات دقيقه شديد وقديمه والزول الايشوف ليهو رجل كبير عاش ربع قرن farao

باالكثير عشان كيد ا ماتخلطوا في الاشياء؟؟؟؟؟؟؟ ومع العذر

من طرف **أحمد حمد** الثلاثاء أغسطس 25, 2009 6:10 pm

ربع قرن شنو الشقلة اقدم من كدة يامحسية وحقو تبدي لينا بي جدك الشيخ علي احمد المحسي أولادو منو؟

من طرف أم أيمن الثلاثاء أغسطس 25, 2009 7:39 pm

الشيخ علي احمد المحسي انت غلطان ياحمد
هو احمد علي المحسي
اولادو = احمد وعبد الرحمن
وعبد الرحمن هوالذى ويلقب بالفحل
والفحل اولادو =الفكي الصديق ومحمد وفاطمة
احمد اولادو =الفكي الامام والبشير وعلي ومحمد وابراهيم وامنة

من طرف أم أيمن الثلاثاء أغسطس 25, 2009 8:02 pm

يا احمد لازم تدفعو لي انا كل يوم بتصل السودان عشان اجيب ليكم المعلومات دي وبعدين انتو من زمان دايرين زول يكتب ليكم ومالاقين اسي مالكم مضايقين اسي انا كلامي دا وثغتو في الشهر العقاري ن

اها تمي

من طرف samahaa الأربعاء أغسطس 26, 2009 5:27 am

بالعكس آنسه عروبه مافي اي زول متضايق من كلامك لانها معلومات في غاية الاهميه وكلنا لازم نعرف نسبنا ونحيي جدودنا ولو بالكلمات مشكوره ع المعلومات وفي انتظار المزيد

من طرف sara ibrahim الأربعاء أغسطس 26, 2009 5:28 am

والله ياعروبه اصلك ماقصرتي معانا
نورتينا واستفدنا منك كتير

من طرف **أحمد حمد** الخميس أغسطس 27, 2009 1:23 am

مشكووووورة عرووووبة الله تستاهلي ندفع ليك الغالي والنفيس نسبة لأهمية الموضوع بس انتي نظامك مع كاش يو زأنا عندي ماستر كارد

من طرف بت سيد البلد الجمعة أغسطس 28, 2009 6:40 pm

لتسهيل المهمة أنا بقتريح أي عضو يكتب اسمو كاملا لحدي ما يتلاقى مع الاسماء الكتبتها عروبة
ابدأ باسم الوالدة لأنها أقرب للنسب
خديجة أحمد عبد الله محمد عبدالرحمن أحمد علي أحمد المحسي

من طرف **أحمد حمد** السبت أغسطس 29, 2009 1:34 am

فكرة هائلة بت سيد البلد
وأنا ببدأ ليكم بأبوي رغم إنو ما سيد بلد
حمد محمد الطاهر محمد عبد الرحمن أحمد علي المحسي
ووالدتي
إحسان خلف الله بابكر الفكي الامام أحمد علي

والفحل اولادو =الفكي الصديق ومحمد وفاطمة
احمد اولادو =الفكي الامام والبشير وعلي ومحمد وابراهيم وامنة

يعني محمد أبو جدي الطاهر أخو الفكي الامام؟

والفحل اولادو =الفكي الصديق ومحمد وفاطمة
احمد اولادو =الفكي الامام والبشير وعلي ومحمد وابراهيم وامنة

من طرف أم أيمن السبت أغسطس 29, 2009 3:23 am

محمد ابو جدك الطاهر ابن عم الفكي الامام

من طرف أم أيمن السبت أغسطس 29, 2009 4:14 am

توضيح لابراهيم علي المبشر
علي احمدعلي المحسي اولادو= محمد والامين احمد فاطمة
ومحمد اولادو= فضل المولي والرقاقة وحليمة وعبد الله
-الامين اولادو= الشييخ ادريس
احمد بنتو = بنت المنى
وفاطمة اولادها =الشيخ المبارك والشيخ محمد احمد

توضيح لابوبكر بشير
ابناء محمد احمد على المحسي هم= عبد الله والتومة وامنه
وعبد الله اولادو= بخيت طيبه وعائشه
والتومه اولادها= الامام والبشير ومصطفى محمد
اما امنه اوولدها= الوحيد هو مساعد
اولاد مساعد=محمد واحمد وابراهيم والامين وبشير
وفاطمة وتم الباقي يا ابوبكر

من طرف sara ibrahim السبت أغسطس 29, 2009 3:01 pm

ساره ابراهيم الامين عبد الرحمن الفكي الامام احمد علي المحسي

مشكوره اخت عروبه
الباقي بشير اولادو
امتثال وفاء هبه سلمي ابوبكر عمر
محمد اولادو حيدر فاطمه وامنه
عائشه درالسلام
احمد اولادو مساعد و محمدوابراهيم
حيدر وفاطمه وامنه
الامين اولادو مساعدوبابكر ومحمدوعبدالقادروعائشه
ودرالسلام
ابراهيم وبناتو وحده طاهره
فامطمه اولاده محمدوابرهيم عباس وخديجه امنه
امنه اولاده بشير وابراهيمو اليسع وفاطمهوستنا وزينب
رقيه ولاده خالد ومساعدو المكاشفي وابراهيم
صفه وعائشه ومهاونجوه
ديل اولاد مساعد

من طرف **أحمد حمد** السبت أغسطس 29, 2009 5:42 pm

الفحل أولادو = الفكي الصديق محمد فاطمة
الفكي ود الفحل ده غير الفكي الامام؟
وأولادو منو؟

من طرف أم أيمن السبت أغسطس 29, 2009 7:32 pm

االاسم كامل كده الفكي الصديق هو دا ابو الخليل ابو امنه جدة رامي

والله يا جماعه في ناس في الشقله لما اشوفنا في الشقله عندناس جدي الامين
بقولو ديل ناس الامين لكن عارفنه الي اليوم انو حبوبتنا محسي

من طرف sara ibrahim الأحد أغسطس 30, 2009 9:07 pm

اختي عروبه الاسماء دي كده صحيحه
ومين جدهم وشكرا

ساره ابراهيم الامين عبدالرحمن الفكي الامام احمد علي

خديجه احمد عبدالله محمدعبد الرحمن احمد علي

حمدمحمد الطاهرمحمد عبد الرحمن احمد علي

احسان خلف الله بابكر الفكي الامام احمد علي

من طرف محسيه وافتخر الأحد أغسطس 30, 2009 10:39 pm

الحصه تعارف ولاشنو Evil or Very Mad

من طرف sara ibrahim الأحد أغسطس 30, 2009 11:58 pm

والله لو قريتي الموضوعكويس
انا قلت يااختي عروبه

من طرف samahaa الإثنين أغسطس 31, 2009 12:30 am

محسيه وافتخر كتب:الحصه تعارف ولاشنو

نعم تعارف
ماقريتي عنوان الموضوع شنو؟
Suspect

من طرف أم أيمن الإثنين أغسطس 31, 2009 4:07 am

االاخت ساره المحترمة الاسم كالاتي
ساره ابراهيم الامين عبدالرحمن الفكي الامام احمد احمد علي المحسي
احسان خلفالله بابكر الفكي الامام احمد احمد علي المحسي
خديجة احمد عبدالله محمد عبد الرحمن احمد علي المحسي
حمد محمد الطاهر محمدعبدالرحمن احمد علي المحسي