يا عبدو عيب

رسالة إلى المشوكشين

في الليلة ديك
القصة ذاتها بقت عليك
يا عبدو وأدوك الشريط
يوم قولنا ليك
أنضم معاها وكلّمها
لكن أبيت تسمع كلامنا
بقيت لميض
وقلتَ.. أحسن أكون زولا تقيل
أنا ما جميل
باكر بعد باكر
بكهربها ليك بي نظرة كتيل
وبقيت تقيل
لامن سقوك موية الغسيل
يوم جيت تنطط زي زمان
وتباري بقعور الشجر
كايس كراسي الخيزران ..
وقعدتَ يا زينة الرجال
كهربجي قال
رفعوا الستار
والبت تجي و تمشي و تلف
مرات تقيف
ومعاها كان زولاً حريف
والوقفة كان وقفة ولف
صاحبنا بالاحساس عرف
وسألتَ والناس كلّموك
ملعون أبوك دنيا أم قدد
بقت البقت
ووقعتَ في شارع الزلط
تبكي وتجعّر
والعيون اتورّمت
يد القميص.. ضهر القميص.. كم القميص
حتى الفنيلة اتشرّطت
يا عبدو عيب
قوم يلا صلي على الحبيب
الواطه صبحت داير ننوم
يا أخوانّا لأ أنا عايز أموت أقع البحر
يا عبدو عيب
الدنيا حر .. والموية بتسخّن عليك
ثلاثة ساعات في الطريق
وزولنا قاعد يسب ويكيل
ودموعو سايلات بالكفوف
وشرايطو تلمع في الكتوف
بقى فيلسوف
شي كلام عن الدنيا أم قدود
وعلاقة بين يوم السبت وعين الحسود
ومقارنات بين الجمال
والجهل وسوء الإختيار
قال شينة قال ...!
قال شينة قلنا كلام صحيح
وخطيبها زاتو ولد قبيح
بس ياخي قوم
الواطة صبحت .. دايرين ننوم
قام تاني جاب سيرة البحر
وقام تااااااااااااااااااني جاب سيرة البحر

وليكم يا المشتحين اضنيكم بقول ليكم اذا مسكتة ما تفك واذا فكيت ما تندم

مع خالص ودي لكم

من طرف samahaa الخميس ديسمبر 24, 2009 12:05 am

ههههههههههههههههههههههههههههههههه
رهيبه والله
والواحد في الزمن دا يكون ميت ع الواحده وما بقول ليها
واول ماتتخطب اظهرو ليها مية واحد
ومن ضمنهم يكون في واحد كانت هي زااااااتها عايزاهو
سبحان الله فيكم يا الاولاد
غريبين

مشكور
تقبل مروري