لسان الحال

من طرف ابو بشير الخميس فبراير 25, 2010 3:13 am

لسان الحال
للشاعر :ـ حاتم حسن الدابي

معذرة .. لو معاك منى الكلام حره
معليش الخطاب كاتباهو مطره
حرام والله مننا انت تتبرا
خمسه سنين تفوت تجى فيها فد مره
وراك انا كم شقيت وعشت فى مره
وتعبت مع البطان الهم للعيون غره
بيخاف الغرق الغاص وراء درة
قالوا ادب الصغار والعقده من خدرة
حليلى انا الزمن ضى فاطرى مانفر
وخمسه سنين غياب ما بتحملن حره
انا الحاضنه العذاب وامالى محتضرة
وانت الفى النعيم ما خات حساب بكرة
مسكينه التقول فى الاغتراب سترة
وتتناسى القروش فى يوم تكون ضرة
حليل زمنك وكت عايشنا بالاجرة
ياريت لا عرفت ولا مرق برة
الكاتمه فى جواى كتير متملك الجوف والعصب
وماكت دايرة اقولو ليك لكن لسان الحال غلب
مابنسى يوم ودعتنا وسافرت فى غرة رجب
خليت وراك الدار حزين يتباكا والدمع اتسكب
اعذرنى والله العظيم لو ما الضرورة انا ما كتبت
وانا خايفه فى بعدك يكون الضاع ضعف المكتسب
اليومه داك ناس البلد هنونى شايقيى وعرب
قالو لى مبروك خيرو جاك يكتب سلامتو الاغترب
قالوا لى دوب نجم السعد
طلاكى من بعد احتجب
يادوبا بالك يستريح
وتنسى العذابات والتعب
فضلت احسب فى الشهور
قاعده لى فوق نيران لهب
صابرة وحريصة على العيال
لا يبقو للريح فى المهب
سديت خانتك من مشيت قايما بواجبى كام واب
والاسره يضنيها المسير
وتتهاوى لو ما فيها رب
والله مابنكر جميلك برضوا لينا ثناك وجب
موكب هداياك ما انقطع
كان سترة فى الزمن الصعب
البيت مفرش بالحرير ومليانه ايدى بالدهب
لكن خسارة على محل عاش سيدو خمسة سنين عزب
الشى المهم ما قلتو ليك وليهو انت ما ظنيت حسب
كبروا الصغيروين خلاص خايفلهم الطبع الكعب
وصلوها مرحلة الخطر والامن لازال مستتب
وانا كنت قادرهم زمان لكن بعد كبروا اتغلب
حصلنى قبل الجد يفوت دوبنهم فوق العتب
قبال نحصد الخير ندم وما بيجدى كان لمت وعتب
خايفلهم الطيش فى الدروس وما برضى لو واحد رسب
وخوفى المتعبنى الكبير بعدين يمرقوا بلا ادب
وريتك الحاصل على لا فيهو ثورة ولا غضب
شان الحديث ما يبقى نى والواحه يكتنفا الجدب
انا قلبى مازال لسه حى ونجمو الملاهلج ما غرب
واخر كلامى تردوا لى لا ابقه بكرة انا السبب
وما كنت دايرة اقالوا ليك لكن لسان الحال غلب

** القصيدة دي لو ما رجعت الناس السودان تاني مافي حاجة بترجع وانا غايتو رآآآآآآآآآآآآآآآآآآآآآجع ..**

انشاء الله قلبك يفضل على طول حى ونجمو ماتغرب ابدا حقيقى يااخونا هذه الاغنية الرائعه تبكينى كل ما اسمعها وقلت ابكيكم معاى شويه واحد دموعوا قريبه ذى كده احسن يكون بعيد او يجى ويجيب بشكير معاهو مش مناديل

من طرف samahaa الخميس فبراير 25, 2010 3:20 am

مشكور والاغنيه فعلا رائعه

من طرف **أحمد حمد** الخميس فبراير 25, 2010 12:21 pm

خايفلهم الطيش فى الدروس وما برضى لو واحد رسب
وخوفى المتعبنى الكبير بعدين يمرقوا بلا ادب
وريتك الحاصل على لا فيهو ثورة ولا غضب
شان الحديث ما يبقى نى والواحه يكتنفا الجدب

فعلاً أبو بشير أكثر من رائعة
والتحية للدابي وهو يجسد معاناة المرأة جراء الغربة والظروف التي تحرم الوالد من مشاركة زوجته في تربية وتعليم الابناء وللمرأة دور كبيير في رعاية الابناء وتستطيع تحمل تلك المسئولية العظيمة ولكن لابد من وجود الرجل جوار أبنائه لمزيد من الاطمئنان

لك التحية وتقبل مروري