ناس الجزيرة الغبش

من طرف بت الشقله الجمعة يوليو 09, 2010 4:26 pm

الناس الغبش

رد علي ( الحنكوشة / بت الخرطوم ) عندما سألت واحد من الجزيره وهو لابس الجلابية والعمه والمركوب بجامعه النيلين .. إنت من الناس الجزيرة الغبش ولا شنو ؟ .. فكان هذا الجواب

أيوه ناس الجزيره غبش
واكان يا حلوه جيتي الجزيره دغش
تشوفي الغباشه الجد
علاله مراح نازل علي البلدات
حمير في شديدا لبد
تسمعي حاو وتعرفي هش
مزارعيه ورواعيه
حدك عريج ما ترش
يتابعو القصبه من كانت أضينة فأر
كدنكاتن قبلي الشلخ
قاطعات السرابه طرش
أيوه ناس الجزيره غبش
ترابله في بطن الأناقي الواسعه
وكت القايله حاره تتش
يفكوا اللبقه للمويه الحبيسه تخش
منو اليا حلوه قال الحضاره قرش
آخر صيحه في العربات
مع شمس النهار ترقش
ده يا حلوه ذاتو الغش
الما بنعرف دروبو
رلا بنعرف عليهو نمش
مبروك عليك يا حلوه
خرتومك المليان خلق
والموضه للبت والولد
من غير فرز وبدون فرق
أمانه لبسك في البيوت
بت الجزيره هناك تحرم تلبسو
ولو بالغلط ..
طلعت تحوم وسط البيوت
باسكيرتي ضيق أو بوضي
تشبع خنق
حنكوشه انتي وبت مدن
ربوك بالعيش السخن
ما عارفه القمح زرعوهو كيف!!
حصدوهو كيف؟!
وبرضو كيف دخل الفرن
الناس الغبش يا فاهمه ليك
زرعوهو هن
وهن كمان زرعو القطن
الناس الغبش أهلي العزاز
العمري ما اتنكرت ليهم
ولا كمان يوم بنكرن
..نحن يا شاطره من الريف
ضربة شمسنا ولا ضل الرقد تكييف
وبرضو نحن أهل قرايه كمان
رموز معروفه بدري زمان
وزراء وسفراء للسودان
والزيك علاجو بسيط وبالمجان
هناك تلقيهو في القرآن
وبرضو كمان
فينا المرهف الفنان
وفينا الشاعر البكتب
يوم يتهيج الوجدان
وفي الختام ..
للناس الغبش أهدي السلام
للمطموره والعيش الفريك
للزارع براو..
والقاسم حصادو مع الشريك
كسرة خلا ..
رويانه بي موية الكنار
عليها بس شطه وملح
ومرات تكون طرقه قمح
رويانه باللبن السمح
للناس الغبش أهدي السلام
لي جدي والحسو الجرح

من طرف **أحمد حمد** الجمعة يوليو 09, 2010 10:51 pm

ههههههههههههههههههههههههههه
والله ولدنا ماقصر مع بت الخرتوم لكن بيني وبينك الجزيرة زاتها انتهت والحنكشة بقت في جميع الارياف موجودة

تقبلي مروري

من طرف سيد الاسم السبت يوليو 10, 2010 2:45 am

برضو فى ثقافتها يظل الكلام ده كلام الطير فى الباقير يعني هي مافارقه معاها ان بقى عندو مراح وله بهيمة واحدة

ناس الجزيرة الغبش

ناس الجزيرة الغبش

رد: ناس الجزيرة الغبش

رد: ناس الجزيرة الغبش